Elimizdiń mádenıeti men óneriniń damýy jolynda tolassyz eńbek etip, ult rýhanıatynyń qanat jaıýyna septigin tıgizip júrgen talantty jandar az emes. Búgin tamyrly tarıhy 1935 jyldan bastaý alǵan Almaty qalasynyń Memlekettik qýyrshaq teatrynda jarty ǵasyrdan astam ýaqyt qajyrly qyzmet etip kele jatqan qazaq qýyrshaq óneriniń «anasy», Qazaq SSR-niń eńbek sińirgen artısi, «Sahnager-2018» Ulttyq teatr syılyǵynyń «Sahnalyq ǵumyr» nomınasıasynyń ıegeri Abýeva Sábıla Meńdiǵalıqyzynyń mereıtoılyq benefısi ótti.
Sábıla Abýeeva salıqaly sahna maıtalmandarynyń sheberliginen ótip, ómir tájirıbesin jınaqtap, mańdaı terin tamyry tereń teatrǵa tógip kele jatqan ardager artıs. Qýyrshaq teatry sahnasynyń patshaıymyna aınalyp, 75-shi beketine kelse de, boıyndaǵy qýaty men shabyty sarqylmaǵan aktrısanyń sahnada júrgenine bıyl 55 jyl.
Sábıla Abýeva 1947 jyly tamyz aıynyń 9-shy juldyzynda Atyraý oblysynda dúnıege kelgen. Alǵashqy eńbek jolyn 1967 jyly Mahambet Ótemisuly atyndaǵy qazaq drama teatrynda bastap, teatr sahnasynda úlkendi-kishili rolderdi oınady.
1969 jyldan Memlekettik qýyrshaq teatrynda óziniń óner jolyn asqan belsendilikpen bastaǵan daryn ıesi búginde ózindik sara jolyn qalyptastyrǵan sheber tulǵalardyń biri. Jarty ǵasyrdan astam kıeli sahnada úzdiksiz eńbek etken teatr ardageri balalarǵa arnalǵan 200-den astam ár túrli janrdaǵy rolderdi somdap keledi. Aktrısanyń árbir keıipkeri kásibıligimen, shynaıylyǵymen erekshelenip, teatr repertýaryndaǵy spektáklderdi kórkeıtýde súbeli úles qosýda. Búginde óziniń izin basyp kele jatqan jastar úshin «ónerdegi ustazy» atanyp ta úlgerdi.
Sahnadaǵy elý bes jyldyq eńbek jolynda qýyrshaq teatrynyń beldi rejıserlary, Qazaqstannyń eńbek sińirgen artısi Pavel Potoroka, QazSSR Halyq artısi Ázirbaıjan Mámbetov, Qazaqstannyń eńbek sińirgen artısi Quralaı Eshmuratova, Qazaqstannyń Halyq artısi Sultanǵalı Shúkirov, QR Mádenıet qaıratkeri Serik Maqulbekov, t.b. óner ıelerimen zamandas bola júrip, ómirlik sahnalyq mektepten ótti.
Kóptegen halyqaralyq, respýblıkalyq festıválderdiń laýreaty. Ulttyq qýyrshaq teatr ónerin damytý jolyndaǵy tolassyz eńbegi úshin qurmet gramotasy, ár túrli alǵys hattarmen marapattalyp keledi. Osy jyldar ishinde elimizdiń barlyq oblystarynda, sondaı-aq, Vetnam, Kompýchıa, Ózbekstannyń Tashkent, Buqara, Samarqand, Túrkmenstannyń Hıýa, Naýaı, Qytaıdyń Pekın, Gýanchjoý, Túrkıanyń Býrsa, Izmır, Reseıdiń Máskeý, Kýrgan, Qyrǵyzstannyń Osh, Bishkek, Japonıanyń Iıda t.b. qalalarynda ótken halyqaralyq qýyrshaq festıválderine qatysyp, qazaq ónerine ólsheýsiz úlesin qosyp keledi. Kóptegen qýyrshaq festıválderinde qazylar alqasynyń turaqty múshesi.
Sábıla Abýeva ózin tek teatr salasynda ǵana emes, ekran óneriniń damýyna da úles qosýda. Máselen, rejıser Bolat Sháripovtyń «Kináratsyz kúná», Gúlshat Omarovanyń «Baqsy», N.Igiliktiń «Janyńda júr jaqsy adam», Sábıt Qurmanbekovtyń «Aýyl saqshysy», Rınat Qosaıdyń «Keńesshiler», Aqan Sataevtyń «Anaǵa aparar jol», Nurtas Adambaevtyń «Kelınka Sabına-2», Gúlbarshyn Abýevanyń «İńkár júrek», E.Ábdijapparovtyń «Arman qala» fılmderinde tústi.
Qýyrshaq teatry – eshqashan qartaımaıtyn, máńgi jas óner ordasy ekenin, kishkentaı kórermenderdiń shat-shadyman, aqjarma kúlkisi teatrǵa máńgilik jas ǵumyr syılatynyn biletin teatrymyzdyń ardager aktrısasy Sábıla Abýevanyń 87 jyldyq teatr tarıhynda sińirgen eńbegi orasan zor.
Mereıtoı aıasynda «Sahna sańlaǵy Sábıla Abýeva» kitabynyń tusaýy kesildi. Kitapta Sábıla Abýeva ulttyq qýyrshaq teatry ónerine qosqan zor úlesi týrasynda tanymal tulǵalardyń, otandyq televızıa ókilderiniń óner ıesi jaıyndaǵy tolǵam-tujyrymdary jınaqtalǵan. Jınaq teatr óneri, onyń ishinde qýyrshaq teatry óneriniń damý jolyna qyzyǵýshylyq tanytqan oqyrmanǵa arnalǵan. Kitapty qurastyrýshy redaktor – ónertaný ǵylymdarynyń magıstri, doktorant, Almaty Memlekettik qýyrshaq teatrynyń Ákimshilik jáne aqparat bóliminiń meńgerýshisi Gúlim Kópbaıqyzy.
Saltanatty keshke QR Mádenıet mınıstrligi Mádenıet komıteti tóraǵasynyń orynbasary Danıar Alıev, Almaty qalasy Mádenıet basqarmasynyń basshysy Ǵanı Maılıbaev, QR Teatr qaıratkerleri Odaǵynyń tóraǵasy, Qazaqstannyń halyq artısi Tuńǵyshbaı Jamanqulov, birqatar drama jáne qýyrshaq teatrynyń basshylary men arnaıy ókilderi qatysyp, júrekjardy lebizderin bildirdi.
Memlekettik qýyrshaq teatrynyń baspasóz qyzmeti
Pikir qaldyrý